പിലാത്തറയിൽ എംഡിഎംഎയുമായി രണ്ട് യുവാക്കൾ പിടിയിൽ.

സമാന്തര മദ്യവിൽപ്പനയ്ക്കൊപ്പം രാസലഹരി വ്യാപനവും ആശങ്ക ഉയർത്തുന്നു. പുതുതലമുറയെ ലക്ഷ്യമാക്കിയാണ് മാഫിയ വളരുന്നത്.

പിലാത്തറ: എംഡിഎംഎയുമായി രണ്ട് യുവാക്കളെ പരിയാരം പോലീസും ഡാൻസാഫ് സംഘവും സംയുക്തമായി നടത്തിയ പരിശോധനയിൽ പിടികൂടി.

മണ്ടൂർ ചുമടുതാങ്ങിയിലെ കമലാക്ഷന്റെ മകൻ പുതിയപുരയിൽ വീട്ടിൽ പി.പി. അബിൻ (24), പിലാത്തറ സി.എം. നഗറിലെ ഹനീഫയുടെ മകൻ വെങ്ങാടൻ വീട്ടിൽ എം.എസ്. അജ്മൽ (27) എന്നിവരെയാണ് ഇന്ന് പുലർച്ചെ പോലീസ് പിടികൂടിയത്.

പുലർച്ചെ 1.45ഓടെ അലക്യംപാലത്ത് കെ.എൽ-59 എ.സി. 6750 നമ്പർ ടൊയോട്ട കാർ കൈകാണിച്ച് നിർത്തി പരിശോധിച്ചപ്പോഴാണ് അജ്മലിൽ നിന്ന് 260 മില്ലിഗ്രാം എംഡിഎംഎ കണ്ടെത്തിയത്. തുടർന്ന് പുലർച്ചെ 3.15ഓടെ വിളയാങ്കോട് ശിവക്ഷേത്രത്തിന് സമീപം നടത്തിയ പരിശോധനയിലാണ് അബിൻ പിടിയിലായത്. ഇയാളിൽ നിന്ന് 250 മില്ലിഗ്രാം എംഡിഎംഎയും പോലീസ് കണ്ടെടുത്തു.

എസ്.ഐ പി. യദുകൃഷ്ണൻ, ഗ്രേഡ് എസ്.ഐ ഇ.വി. വിനോദ്, സി.പി.ഒ ദിലീപ് എന്നിവരടങ്ങിയ പോലീസ് സംഘമാണ് പരിശോധന നടത്തിയത്.

ലഹരി വ്യാപനം സംബന്ധിച്ച് ആശങ്ക

അടുത്ത കാലത്തായി പിലാത്തറയിലും സമീപ പ്രദേശങ്ങളിലും സമാന്തര മദ്യവിൽപ്പനയ്ക്കൊപ്പം എംഡിഎംഎ പോലുള്ള രാസലഹരിവസ്തുക്കളുടെ വിൽപ്പനയും ഉപയോഗവും സംബന്ധിച്ച പരാതികളും റിപ്പോർട്ടുകളും ഉയരുന്ന സാഹചര്യത്തിലാണ് പുതിയ സംഭവം 

യുവാക്കളെയും വിദ്യാർഥികളെയും ലക്ഷ്യമിട്ടുള്ള ലഹരി വ്യാപനം തടയാൻ തൂഫാൻ മാതൃകയിൽ പോലീസ് പരിശോധനകൾ ശക്തമാക്കണമെന്ന ആവശ്യം വിവിധ ഭാഗങ്ങളിൽ നിന്ന് ഉയരുന്നുണ്ട്. അതേസമയം, പ്രദേശത്ത് രാസലഹരി ഉപയോഗവും വിൽപ്പനയും യഥാർത്ഥത്തിൽ എത്രത്തോളം വർധിച്ചിട്ടുണ്ടെന്നത് വ്യക്തമാക്കാൻ ഔദ്യോഗിക കണക്കുകൾ ആവശ്യമാണ്. പിലാത്തറയിലെ പല കടകളിലും നിരോധിത പുകയില ഉൽപ്പന്നവില്പന നടക്കുന്നുണ്ടെന്ന് നാട്ടുകാർ ആരോപിക്കുന്നു. 

പോലീസ് പരിശോധനകളും ലഹരി വിരുദ്ധ നടപടികളും ശക്തമാക്കുന്നതിനൊപ്പം, ലഹരി ഉപയോഗത്തിന്റെ അപകടങ്ങളെക്കുറിച്ച് യുവാക്കൾക്കിടയിൽ ബോധവൽക്കരണവും ശക്തമാക്കേണ്ടതുണ്ടെന്ന അഭിപ്രായവും ഉയരുന്നുണ്ട്.

.