പിലാത്തറ ചന്തപ്പുര റോഡ് വികസനം സർവ്വേ നടപടികൾ തുടങ്ങി.

മലയോര മേഖലയിലേക്കുള്ള പ്രധാന പാതയായ ചെറുതാഴം-കുറ്റൂർ-പെരിങ്ങോം റോഡിന്റെ ഭാഗമായ പിലാത്തറ മുതൽ ചന്തപ്പുര വരെ റോഡ് വികസനം സർവ്വേ നടപടികൾ ആരംഭിച്ചു.

പ്രസ്തുത റോഡിൽ പിലാത്തറ മുതൽ മാതമംഗലം വരെ റോഡ് അത്യാവശ്യമായ സ്ഥലങ്ങളിൽ അടിത്തറ ശക്തിപ്പെടുത്തി 5.50 മീറ്ററിൽ നിന്നും 7 മീറ്റർ വീതി കൂട്ടി മെക്കാഡം ടാറിംഗ് ചെയ്യുവാനും കൾവർട്ടുകൾ, ഡ്രെയിനേജ് എന്നിവ പുതുക്കിപ്പണിയുന്നതിനും ആവശ്യമായ സ്ഥലങ്ങളിൽ പുതിയ കൾവർട്ടും ഡ്രെയിനേജും ആധുനിക രീതിയിലുള്ള റോഡ് സുരക്ഷ സംവിധാനങ്ങളും പദ്ധതിയിൽ വിഭാവനം ചെയ്തിട്ടുണ്ട്. 

ആദ്യഘട്ടത്തിൽ മാതമംഗലം റോഡിലുള്ള ആൽമരം അടക്കമുള്ള വൃക്ഷങ്ങൾ മുറിക്കേണ്ടതായിട്ടുണ്ട്. നിലവിലുള്ള ഡ്രൈനേജ് സിസ്റ്റത്തിലും മാറ്റം വരും. ബിഎസ്എൻഎൽ ടെലിഫോൺ പോസ്റ്റുകൾ, കെഎസ്ഇബി പോസ്റ്റുകൾ, ട്രാൻസ്ഫോർമർ തുടങ്ങിയവ മാറ്റേണ്ടതായിട്ടുണ്ട്. റോഡ് വികസനത്തിന്റെ ഭാഗമായി ബിഎസ്എൻഎൽ, കെഎസ്ഇബി ഉദ്യോഗസ്ഥരുടെ മേൽനോട്ടവും ഉണ്ടാകും. 

പിലാത്തറ മുതൽ ചന്തപ്പുര വരെ 6 കോടി രൂപയും, ചന്തപ്പുര മുതൽ മാതമംഗലം വരെ 5 കോടി രൂപയും, പിലാത്തറ ടൗൺ സൗന്ദര്യ വത്കരണത്തിന് നവകേരള സദസിൽ ഉൾപ്പെടുത്തി 2 കോടി രൂപയും ഉൾപ്പെടെ ആകെ 13 കോടി രൂപയാണ് അനുവദിച്ചത്. ഇതിൽ ടെൻഡർ നടപടി പൂർത്തീകരിച്ച് കരാറുടമ്പടിയിലേർപ്പെട്ട ചന്തപ്പുര മുതൽ മാതമംഗലം വരെയുള്ള ആദ്യഘട്ട പ്രവൃത്തി നേരത്തെ ആരംഭിച്ചിരുന്നു. 

പിലാത്തറ ടൗൺ മുതൽ താഴെ കൺവെർട്ട് വരെയുള്ള 300 മീറ്റർ റോഡ് ഇൻറർലോക്ക് അടക്കം 10 മീറ്ററിലേക്ക് മാറ്റപ്പെടും. പിലാത്തറയിലെ ബിൽഡിംഗ് ഓണേഴ്സ് അസോസിയേഷൻ വ്യാപാര സ്ഥാപനങ്ങളിൽ ഏത് രീതിയിലുള്ള മാറ്റത്തിനും തയ്യാറാണെന്ന് അറിയിച്ചിട്ടുണ്ട്.