പയ്യന്നൂർ എടാട്ട് ശ്രീ തൃക്കൈ മഹാവിഷ്‌ണു ക്ഷേത്രം നവരാത്രി ആഘോഷം.

നവരാത്രി ഉത്സവത്തോട് അനുബന്ധിച്ച് ക്ഷേത്രത്തിൽ സെപ്റ്റംബർ 30-ാം തീയതി ചൊവ്വാഴ്ച ദുർഗാഷ്ടമി ദിനത്തിൽ ഭഗവതിക്കായിക്കൊണ്ട് കളമെഴുതി സഹസ്രനാമാർച്ചനയും ഭഗവതീസേവയും നടക്കും.

കളമെഴുത്തിന്റെ ഐതീഹ്യവും, ഫലസിദ്ധിയും🌸

ദാരിക വധം നടക്കുന്ന സന്ദർഭത്തിൽ, ദാനവതി തൻ്റെ ഭർത്താവിൻ്റെ പ്രാണരക്ഷാർത്ഥം ശ്രീപാർവ്വതിയെ തപസ്സ് ചെയ്തു വസൂരി മുത്തുകൾ വരമായി വാങ്ങി. തന്മൂലം ദാരികനുമായുള്ള യുദ്ധ വേളയിൽ, ദാനവതി വസൂരി മുത്തുകളെ ഭദ്രകാളിക്ക് എതിരെ ഉപയോഗിക്കുകയും, ഭഗവതിക്ക് വസൂരി പിടിപെടുകയും ചെയ്തു. വസൂരിയുടെ തീവ്രതയിൽ മോഹാലസ്യപ്പെട്ട് വീണ ഭഗവതിയുടെ ക്ഷീണം തീർക്കുന്നതിനായി, ശിവൻ കണ്ഠാകർണ്ണനെ സൃഷ്ടിച്ചു. ഭദ്രകാളിയുടെ ശരീരത്തിലുള്ള വസൂരി കുരുക്കളെ നശിപ്പിക്കാനായി കണ്ഠാകർണ്ണൻ ഭഗവതിയെ തലോടുകയും, ക്ഷീണം തീർന്ന ഭഗവതി പിന്നീട് പൂർണ്ണ തേജസ്സോടെ ധാരികനെ നിഗ്രഹിക്കുകയും ചെയ്തു.

     എന്നാൽ ഇതേസമയം ഭഗവതിയുടെ ഉഗ്രകോപം കൊണ്ട് പ്രപഞ്ചം മുഴുവൻ കരിനിഴൽ വീണു. സർവ്വതും നശിക്കുമെന്നായി. തത്സമയം ഭഗവതിയുടെ കോപം ശമിക്കുവാൻ, സ്വർണ്ണ പൊടിക്ക് പകരം മഞ്ഞപ്പൊടിയെക്കൊണ്ടും, വെള്ളിപൊടിക്ക് പകരം അരിപ്പൊടിയെ കൊണ്ടും, കൃഷ്ണപ്പൊടിക്ക് പകരം കരിപ്പൊടിയെക്കൊണ്ടും, മൂന്നുകൊണ്ട് അഞ്ചായ് ചമച്ച് പഞ്ചവർണ്ണ പൊടികളെ കൊണ്ട് ഭഗവതിയുടെ രൂപക്കളത്തെ നിലത്ത് തീർക്കുവാനും, സ്തുതികൾ കൊണ്ട് പ്രീതിപ്പെടുത്തുവാനും ദേവർഷിയായ നാരദമഹാമുനി നിർദ്ദേശിച്ചു.

ഈ നിർദ്ദേശാനുസരണം കുറുപ്പന്മാർ ഭഗവതിക്കളം തീർക്കുകയും, കളം കണ്ട ദേവി കോപം വെടിഞ്ഞ് ശാന്തയായിക്കൊണ്ട് ഏവരെയും അനുഗ്രഹിക്കുകയും ചെയ്തു. പിന്നീട് ഇപ്രകാരം കളമെഴുത്ത്, ദേവീ ചരിതം വർണ്ണിക്കുന്ന പാട്ടോടുകൂടിയും, സഹസ്രനാമ സ്തുതികളോടുകൂടിയും കാലാകാലങ്ങളായി ആചരിച്ചു വരുന്നു.

ഇപ്രകാരം കളമെഴുത്ത് വഴിപാട് നടത്തുന്നത് സർവ്വദോഷനിവാരണം, കാര്യവിജയം, ഐശ്വര്യവർദ്ധനവ് എന്നിവയ്ക്ക് ഉത്തമമാണെന്ന് വിശ്വസിക്കപ്പെടുന്നു. മാത്രമല്ല ഇപ്രകാരം വഴിപെടുന്ന ഭക്തരിൽ ഭഗവതീകടാക്ഷം ഉണ്ടായി, ഭക്തരുടെ വരുന്ന കാലത്തെ ഭദ്രമാക്കി കൊടുക്കുന്നുവെന്നും, ഭക്തരുടെ വരും തലമുറയെപ്പോലും അല്ലലില്ലാതെ പോറ്റുന്നു എന്നുമാണ് ആചാര്യന്മാർ അഭിപ്രായപ്പെടുന്നത്.

ഈ വർഷത്തെ നവരാത്രി ഉത്സവത്തോട് അനുബന്ധിച്ച് നമ്മുടെ ക്ഷേത്രത്തിൽ, സെപ്റ്റംബർ 30-ാം തീയതി ചൊവ്വാഴ്ച (നാളെ), ദുർഗാഷ്ടമി അന്നേയ്ക്ക്, ഭഗവതിക്കായിക്കൊണ്ട് കളമെഴുതി സഹസ്രനാമാർച്ചനയും ഭഗവതീസേവയും നടത്തുവാൻ തീരുമാനിച്ചിരിക്കുന്നു. ആയതിലേക്ക് എല്ലാ ഭക്തജനങ്ങളുടെയും പൂർണ്ണസഹായ-സഹകരണങ്ങളും, പങ്കാളിത്തവും ദേവീ നാമത്തിൽ അഭ്യർത്ഥിച്ചുകൊള്ളുന്നു.

ദേവീ പ്രീതിക്കായിക്കൊണ്ട് ഭക്തർക്ക് ഇതിനാൽ, കളമെഴുത്ത്, ഭഗവതീസേവ, പറ നിറയ്ക്കൽ എന്നീ വിശേഷാൽ വഴിപാടുകൾക്ക് പണമടച്ച് രസീത് കൈപ്പറ്റാവുന്നതാണ്.

🌸 ഇന്ന് വൈകിട്ട് കൃത്യം 6:30 മണിയോടെ പ്രത്യേകം തയ്യാറാക്കിയ ഭഗവതിക്കളത്തിൽ ഭഗവതീസേവയും, തുടർന്ന് പറയെടുപ്പും നടക്കും.

🌸🌸 അമ്മേ ശരണം🌸🌸

🌸🌸 ദേവീ ശരണം🌸🌸