പറശ്ശിനി മടപ്പുര ശ്രീ മുത്തപ്പൻ പുത്തരി തിരുവപ്പന മഹോത്സവം ഡിസംബർ 2ന് ആരംഭിക്കും

കണ്ണൂർ: പറശ്ശിനി മടപ്പുര ശ്രീ മുത്തപ്പൻ പുത്തരി തിരുവപ്പന മഹോത്സവത്തിന് ഡിസംബർ 2 ചൊവ്വാഴ്ച കൊടിയേറും. രാവിലെ 9.47 മുതൽ 10.10 വരെയുള്ള മുഹൂർത്തത്തിൽ നടക്കുന്ന കൊടിയേറ്റം പി. എം. സതീശൻ മടയന്റെ സാന്നിധ്യത്തിൽ മാടമന ഇല്ലത്ത് നാരായണൻ തമ്പ്രാക്കൾ നിർവഹിക്കും.

മഹോത്സവാഘോഷങ്ങളുടെ ഭാഗമായി ഉച്ചയ്ക്ക് തറവാട്ടിലെ മുതിർന്ന സ്ത്രീ വ്രതശുദ്ധിയോടെ തയ്യാറാക്കിയ നിവേദ്യങ്ങൾ ശ്രീകോവിലിൽ സമർപ്പിക്കും. തുടർന്ന് 3 മണിമുതൽ മലയിറക്കൽ കർമ്മവും 3.30 മുതൽ തയ്യിൽ തറവാട്ടുകാരുടെ പാരമ്പര്യ ആയോധനകലാ അഭ്യാസത്തോടുകൂടിയ കാഴ്ചവരവും ക്ഷേത്രത്തിൽ പ്രവേശിക്കും. തലശേരി, കോഴിക്കോട് ഉൾപ്പെടെ വിവിധ പ്രദേശങ്ങളിൽ നിന്നുള്ള പതിനഞ്ചോളം ദേശക്കാരുടെ വർണ്ണപ്പകിട്ടാർന്ന കാഴ്ചവരവുകളും മുത്തപ്പൻ സന്നിധിയിൽ എത്തും.

സന്ധ്യയ്ക്ക് മുത്തപ്പന്റെ വെള്ളാട്ടവും തുടർന്നു അന്തിവേളക്ക് പറശ്ശിനി മടപ്പുര കുടുംബാംഗങ്ങളും കഴകക്കാരും കുന്നുമ്മൽ തറവാട്ടിലേക്കുള്ള കലശം എഴുന്നള്ളിക്കും. തുടർന്ന് പഞ്ചവാദ്യ ഘോഷയാത്രയോടുകൂടി കലശം മടപ്പുരയിൽ എത്തിക്കും.

ഡിസംബർ 3ന് പുലർച്ചെ 5.30ന് തിരുവപ്പന ആരംഭിക്കും. രാവിലെ 10 മണിയോടെ തയ്യിൽ തറവാട്ടുകാരെയും വിവിധ ദേശങ്ങളിൽ നിന്നെത്തുന്ന കാഴ്ചവരവുകാരെയും ശ്രീ മുത്തപ്പൻ അനുഗ്രഹിച്ച് യാത്രയയക്കും. ഡിസംബർ 6ന് കലശാട്ടത്തോടുകൂടി മഹോത്സവം കൊടിയിറങ്ങും. തുടർന്ന് എല്ലാ ദിവസങ്ങളിലും തിരുവപ്പനയും വെള്ളാട്ടവും ഉണ്ടായിരിക്കും.

ഉത്സവത്തോടനുബന്ധിച്ച് പറശ്ശിനി മടപ്പുര ശ്രീ മുത്തപ്പൻ കഥകളിയോഗത്തിന്റെ ആഭിമുഖ്യത്തിൽ ഡിസംബർ 5ന് കുചേലവൃത്തം, കിരാതം എന്നിവയും ഡിസംബർ 6ന് കല്യാണ സൌഗന്ധികം എന്ന കഥകളിയും അരങ്ങേറും.

#kannur #പറശ്ശിനി #മടപ്പുര #parassinikadavu #muthappan #muthappantemple #pilathara_dot_com